Shirika la habari la ABNA linaripoti kuwa: Katika kuonyesha kutetea upande wa magaidi nchini Syria Kansela wa Ujerumani Angela Merkel leo amerudia katika hotuba aliyoitoa bungeni leo pendekezo lake la kuwa na eneo ambalo haliruhusiwi ndege kuruka nchini Syria ambako raia watalindwa, wazo ambalo limepuuziwa haraka na Urusi , ambayo imesema hatua hiyo inawezekana tu kwa ridhaa ya serikali ya Syria.
Ujerumani na washirika wake wa Ulaya , Marekani na waarabu wanataka kutumia njia hiyo kuwapa nafasi magaidi kama walivyofanya nchini Libya na kupelekea utawala wa Gaddafi kuanguka na kusababisha hali ya amani kupotea kabisa nchini humo mpaka hivi sasa.
Mjini Damascus , zaidi ya malori 100 yaliyobeba mahitaji ya kiutu yalitarajiwa kuondoka kwenda katika maeneo matano yanayokaliwa na magaidi yaliyozingirwa na majeshi nchini humo, ikiwa ni sehemu ya juhudi zinazoelezwa na afisa mmoja wa Urusi kuwa ni hatua ya kwanza kuelekea utekelezwaji wa makubaliano yaliyofikiwa miongoni mwa mataifa yenye nguvu duniani mjini Munich wiki iliyopita.
Mjumbe wa Umoja wa Mataifa Staffan de Mistura amekuwa akijaribu kuhakikisha kwamba misaada hiyo inaimarisha nafasi ya kuanza tena mazungumzo ya amani kabla ya kufikia mwisho wa mwezi huu.
Lakini juhudi hizo zimetiwa kiwingu na mapigano makali kaskazini mwa Aleppo, ambako makundi mbali mbali yanayoungwa mkono na mahasimu wa kikanda na kimataifa wanakabiliana kukamata sehemu ya eneo la ardhi linalounganisha mji wa pili kwa ukubwa nchini Syria na mpaka na Uturuki.
Makundi ya kigaidi yanayoungwa mkono na nchi za magharibi na ghuba yamejikuta yakikimbia na kuacha silaha baada ya majeshi ya Syria yakisaidiwa na Urusi na Iran kushadidisha mashambulizi dhidi ya magaidi hao ili kuokoa miji iliyotekwa na magaidi hao na hatimaye kuruhusu wananchi kurudi kwenye makazi yao.
Mwisho wa habari/ 291
